Mesjamna sera, ils 12-6-2019 seradunan 16 persunas el Dacasa a Vella. Ellas arrivan da Cons e Surcasti, Silgin e Cumbel – dall’entira Val Lumnezia per separticipar al project dall’artista Agnes Barmettler.
Amiez la stanza da sesida stat ina gronda meisa. Sin quella sesanfla ina teila cun in labirint. Agnes Barmettler declara: «Labirints ein fuormas che ein gia enconuschentas dapi 5000 onns sin gl’entir mund. La fuorma dil labirint svanescha magari ord la schientscha dallas culturas. Ella vegn denton adina puspei prida neunavon, cura ch’ei va per s’orientar danovamein sco individi ni sco societad.» L’artista tschenta als participonts ed allas participontas las suandontas damondas: «Co lein nus viver el futur ella vallada? Tgei duvrein nus, tgei buc? Tgei lein nus prender cun dil vargau, tgei duvrein nus pigl avegnir?»
Ils cavazzins che vegnan endamen vegnan nudadi sin tocs da cartun, faldai e plazzai sil labirint. La noziun «cuminonza» ei la pli frequenta. Denton era ils plaids «carezia/amur» e «natira» vegnan avon pliras gadas. Ei para ch’ins ei perina tgei ch’ins drova ni vul per viver ina veta en in liug muntagnard. Mo Agnes Barmettler vul buc exponer bustabs sin cartun, ed en ina secunda fasa han ils participonts e las participontas peda da discutar co descriver quels basegns senza plaids, mo cun maletgs ni objects che mintgin e mintgina capeschi.
La sera varga spert ed ins vul puspei sentupar per discussiunar vinavon. Fin a dumengia, ils 8 da settember ha gruppa peda da sviluppar las ideas. Lu suonda il di d’acziun, cu las ideas vegnan rimnadas e messas entuorn en in’ovra da cuminonza sut la bitgetta dad Agnes Barmettler. L’ovra vegn documentada e vegn puspei a svanir. La documentaziun vegn installada ella Casa d’Angel.
© Text: Anne-Louise Joël