Ina prognosa davart il futur dalla regiun e lur habitont*as ei difficila da far. Ils davos onns ei la populaziun dalla Surselva sesminuida marcantamein. La scola vegn fusiunada, la stizun dil vitg sto serrar, ei dat negin’ustria pli – sch’ins crei a szenarios futuristics pusseivels, dat ei per biars vitgs muntagnards en Surselva negin futur. En 20 onns vegn ei a dar aunc pli pauc glieud els vitgs che. Mo han vitgs muntagnards propi negin potenzial? Co lein nus viver egl avegnir cheu en las muntognas?
Art pigl avegnir? L’exposiziun futur mira viaden egl avegnir da vitgs muntagnards. Savess igl avegnir forsa scher egl art? Las artistas Agnes Barmettler, Jacinta Candinas, Sandra Knecht, Celia Längle ed Ella Littwitz (ensemen cun l’architecta Michal Baroz), igl artist Christian Ratti ed in giuven collectiv da Tersnaus realiseschan projects els vitgs dalla Lumnezia e tschercan il contact cun expert*as e habitont*as.
Co lein nus viver egl avegnir cheu en las muntognas? Ina risposta concreta vegn ei aunc buca dar pil mument – denton propostas nua ch’ins savess entscheiver e co ins sa s’avischinar alla tematica.
© Text: Annatina Nay, annatinanay.ch