Celebrar muntognas e nostalgia

Tier la storscha viers Tersnaus spetgan entgins dil team Buatsch cun in rapid. Quel survescha sco bar e transport da bagascha. In braulio, tschun minutas a pei, in ulteriur caraun e treis muossavias pli tard, arriv’ins sil il bein puril dalla famiglia Albin – il liug dil festival Buatsch.

All’entrada cumpr’ins in bigliet e survegn ina medaglia: in pign buatsch da gep suleraus en aur ch’ins sa pender entuorn culiez. Ei dat precis directivs – pagar sa mintgin con ch’el ni ella vul. Sin meisa schai il budget dil festival – ei regia transparenza. Per tgi che sedecida dad aunc gidar last minute, dat ei ina gliesta per s’inscriver. Tut ei flexibel e fetg spontan. «Hääärzlech willkommä hie am festivau Buuuu-atsch», il giuven bernès informescha, davart il sistem dil festival – tgei ch’ei da far e suandar. Negins stumbels da cigarettas giun plaun sigl areal dil bein puril. Sil cup vegn scret il num, lavar giu la vischala sto mintgin sez, il campadi secatta ordvart sin pastira e la tualetta en nuegl. Tut ei empau auter – il Buatsch celebrescha l’amur el detagl. Igl ei vegniu baghegiau e creau cun engaschi. La tribuna che schai amiez il prau ei in construct rufinau. «Nus vein baghegiau dus dis vidlunder», tradescha in gidonter. Il pli cumplicau seigi ei stau da baghegiar il tetg. La tribuna penda ella preit ed il publicum dil buatsch gauda la pli biala vesta vi sin la Lumnezia su. Gl’emprem seigi tut stau empau caotic, aschunta in’autra gidontra, ins vessi pressapauc emblidau da construir ina tualetta. Mo alla fin finala veigi tut tuttina funcziunau fetg bein.

La via viers igl areal da festival meina sper la «cuschina» vi, il clavau ei uss ustria e bar, lavar giu vischala san ins tier la staziun «Abwaschstrasse» dasperas e dretg da quella secatta la posta. Ina posta al festival? Al Buatsch san ins scriver brevs analogas. Mintga pèr uras vegn la scaffa da brevs svidada e las brevs repartidas. Ei vegn celebrau e viviu nostalgia e communitad. Anavos tier gl’origin para dad in punct central – ils dalla bassa tuornan ellas muntognas. Visitadras e visitaders arrivan plitost da lunsch che damaneivel. Indigens sepiardan mo paucs a Tersnaus.

Il programm ei pulpius e l’atmosfera lucca. Concerts e musica cuors da jarvas curativas, baghegiar ina tuor da siemis (Contribuziun da blog: Turmbau zu Tersnaus), exposiziun da buatscha vid la preit avon nuegl, prelecziuns, diversas tschaveras da cuminonza e far uorden la dumengia endamaun. Ina fin d’jamna idillica per serecrear en micromund utopic. Il festival buatsch ei daveras ina pèdra el lidimer ch’ei ha valiu la peina da cattar.

Il festival Buatsch ei vegnius organisaus dil collectiv Tersnaus e ha giu liug en rama dall’exposiziun FUTUR ils 2-4 d’uost 2019 a Tersnaus en Val Lumnezia.

© Fotografias derivan dad Avi Sliman che viva per part a Tersnaus. Tut ils dretgs schain tier Avi Sliman Photography.
© Text: Annatina Nay, annatinanay.ch